Sunday, May 1, 2011

पशु पालन

-जनकवि स्व.कोदूराम "दलित"

हमर   देश -  मा  ये  दारी ,  बाढ़िन  हें  अड़बड़  मनखे
कोन्हों  किसिम  पेट-पाले  बर हे , हमला  सब झन के

बात करौ बिलकुल कमती, अउ काम करो अब ज्यादा
अपन  देश के  उन्नति- मा ,  चिटको  डारौ  झन  बाधा

खाये  के  सब  चीज  खूब ,  अब   पैदा  करना   परिही
तभे   भुखमरी  के  भारी  ,  संकट  हर  जल्दी   टरिही

करत हवयं  बपुरा  किसान - मन ,मिल के खेती-बारी
पैदा  होये  लगिस  गजब  अब , स्यारी  अउर उन्हारी

पर  अतके-च  अनाज  सबो ,  बर पूर नी सकय भाई
इही   पाय   के   पेट   भरे   बर ,   होवत  हे  कठिनाई

खाये  बर  अब   दूसर  चीज ,  घलो  उपजाना   चाही
जेला  जऊन  सुहाय , तऊन  चीज -ला  खाना   चाही

बाग - बगीचा  मा  हम  सुग्घर ,  फल  के पेड़ लगाई
बारी  -  बखरी  मा   भाजी -  तरकारी   बोवत   जाई

तरिया - मा , डबरा- मा , कतला - रोही  मछरी  बोई
एक  बछर - मा  एक - एक , दस-दस रूपया के होही

पालो  गाय  , भइंसा  अउ  छेरी , दही -  दूध पाये बर
पोसीं  कुकरी  - बदक , गार  बेंचे  बर  अउ  खाये बर

गाय, भइंस ,कुकरी पाले बर ,मिलथे  ऋण सरकारी
ये  धन्धा -  मा कतको  झन  के  , दुरिहाइस  बेकारी

तुम  पशु-पालन ,मुर्गी - पालन केंद्र मनन मा जावौ
इन्ह ला  पाले - पोसे  के ,  सब  बात सीख के  आवौ

कांदी ,  भूँसा , दाना , खरी , बिनौला   खूब   खवावौ
अपन  गाय  - गोरू  मन -ला,नीरोग बलिष्ठ बनावौ

रखो  बने  कोठा - मा, मँगसा - भुसड़ी  सबो भगावौ
तइहा  जुग-कस  दूध- घीव के नदिया आज बोहावौ

देबी  के  पूजा   करथौ ,   'माता'  खातिर   मनमानी
तजो  अंध  बिस्वास , करावत  जाव  दवाई -  पानी

रोगी   होते   साठ  ,   मवेशी -  अस्पताल  ले  जावौ
खूरा - चपका , माता  के   'टीका'  उन्ह ला लगवावौ

कुकरा - कुकरी  सब्बो  के  , उहँचे  इलाज  हर होथै
जो   इलाज  करवाय  नहीं ,  मुड़  धर  के  वो   रोथै

पालिस 'गऊ' गोपाल-कृष्ण हर दही-दूध तब खाइस
अउर  दूध  छेरी  के ,   'बापू-ला'   बलवान   बनाइस

बने  किसिम  के  पशु - पंछी  अब, खूब पालना चाही 
बढ़िही   उत्पादन हर  ,खाद्य-समस्या  हल हो जाही

जुरमिल   के  सब  रहो  प्रेम  से , खूब कमावौ खावौ
अउ  सुराज  के  पावन  गंगा , घर - घर  मा पहुँचावौ

         
                  ********************

1 comment:

  1. सुकवि जनकवि स्व.कोदूराम "दलित" जी की कविता यथार्थपरक सुन्दर सार्थक है. इस महत्वपूर्ण प्रस्तुति के लिए आपको हार्दिक बधाई।

    ReplyDelete